गुढी ‘या’ दिशेला उभारू नका; जाणून घ्या वास्तूशास्त्र

गुढीपाडवा हा साडेतीन मुहूर्तांपैकी एक अत्यंत शुभ दिवस मानला जातो. 19 मार्च 2026 रोजी साजऱ्या होणाऱ्या या सणापासून नवीन संवत्सराची सुरुवात होते. गुढी उभारणे ही केवळ परंपरा नसून विजय, यश आणि समृद्धीचे प्रतीक आहे. मात्र, वास्तूशास्त्रानुसार गुढी योग्य दिशेला उभारणे तितकेच महत्त्वाचे मानले जाते.

गुढीसाठी कोणती दिशा सर्वोत्तम?

वास्तूशास्त्रानुसार गुढी उभारण्यासाठी पूर्व दिशा सर्वात शुभ मानली जाते. ही दिशा सूर्यदेवाची असल्याने सकाळची पहिली किरणे गुढीवर पडतात आणि घरात सकारात्मक ऊर्जा निर्माण होते, अशी श्रद्धा आहे.

जर पूर्व दिशेला जागा उपलब्ध नसेल, तर ईशान्य (ईशान कोपरा) हा उत्तम पर्याय मानला जातो. हा कोपरा देवतांचा मानला जात असल्याने घरात शांतता आणि समाधान टिकून राहते.

‘या’ दिशांना गुढी उभारणे टाळा

गुढी कधीही दक्षिण किंवा नैऋत्य दिशेला उभारू नये, असे वास्तूशास्त्र सांगते. या दिशा पितर आणि यमाशी संबंधित मानल्या जातात. त्यामुळे विजयाचे प्रतीक असलेली गुढी या दिशांना उभारल्यास नकारात्मक परिणाम होऊ शकतात, अशी समज आहे.

यामुळे घरात तणाव वाढणे, आर्थिक अडथळे येणे किंवा कामांमध्ये विलंब होणे अशा समस्या उद्भवू शकतात, असे मानले जाते.

हेही वाचा- गुढीपाडव्याच्या दिवशी या 5 गोष्टी टाळा; नाहीतर वर्षभर अडचणी येऊ शकतात

गुढी उभारताना या गोष्टी लक्षात ठेवा

1. स्वच्छ आणि मोकळी जागा निवडा
गुढी नेहमी स्वच्छ ठिकाणी उभारावी. कचरा, चपला किंवा अस्वच्छता असलेल्या जागी गुढी उभारणे टाळावे.

2. उंची आणि स्थिती योग्य ठेवा
गुढी जमिनीला टेकलेली नसावी. ती थोडी उंच आणि किंचित बाहेरच्या दिशेला झुकलेली असावी, ज्यामुळे ती दूरवरून दिसते.

3. रांगोळी आणि तोरणाने सजावट करा
गुढीखाली सुंदर रांगोळी काढावी आणि मुख्य दरवाजाला आंबा किंवा अशोकाच्या पानांचे तोरण लावावे. यामुळे घरात सकारात्मक वातावरण निर्माण होते.

4. कलशावर स्वस्तिक काढा
गुढीवर ठेवलेल्या तांब्याच्या कलशावर कुंकवाने ‘स्वस्तिक’ चिन्ह काढणे शुभ मानले जाते. हे चिन्ह अडथळे दूर करून प्रगतीचा मार्ग मोकळा करते, अशी श्रद्धा आहे.

सकारात्मक सुरुवातीसाठी योग्य दिशा महत्त्वाची

गुढीपाडवा हा नव्या वर्षाची सुरुवात दर्शवणारा सण आहे. त्यामुळे गुढी उभारताना योग्य दिशा आणि पद्धती पाळल्यास घरात सुख, शांती आणि भरभराट येते, अशी धारणा आहे.

यंदा गुढी उभारताना या वास्तू नियमांचे पालन करा आणि नववर्षाचे स्वागत आनंद, उत्साह आणि सकारात्मकतेने करा.