सांगली जिल्ह्यात पीएनजी (पाइपद्वारे नैसर्गिक गॅस) असलेल्या घरांमध्ये आता एलपीजी सिलिंडर ठेवता येणार नाही, असा निर्णय प्रशासनाने घेतला आहे. यामुळे दुहेरी गॅस कनेक्शनवर निर्बंध लागू होणार आहेत.
जिल्हाधिकारी डॉ. मैनाक घोष यांनी गॅस वितरकांना तातडीच्या सूचना देत सांगितले आहे की, ज्या ग्राहकांकडे पीएनजी आणि एलपीजी दोन्ही कनेक्शन आहेत, त्यांचे एलपीजी कनेक्शन बंद करण्यात येणार आहे.
सांगली शहरातील सुमारे 2500 ग्राहकांना पाइपलाइनद्वारे गॅस पुरवठा सुरू आहे. या ग्राहकांना त्यांच्या घरातील एलपीजी सिलिंडर जमा करण्याचे आदेश देण्यात आले आहेत. पुढील टप्प्यात तीन महिन्यांच्या आत एलपीजी पुरवठा पूर्णपणे बंद करण्याची कारवाई केली जाणार आहे.
ज्या भागांमध्ये पीएनजी सेवा उपलब्ध आहे, तेथील ग्राहकांनी एलपीजी कनेक्शन समर्पित करणे बंधनकारक असेल. काही तांत्रिक अडचणी असल्यास केवळ अधिकृत NOC मिळाल्यासच एलपीजी सुरू राहू शकतो, असेही प्रशासनाने स्पष्ट केले आहे.
या निर्णयामुळे नागरिकांमध्ये संभ्रम निर्माण झाला असून, विशेषतः गृहिणींमध्ये चिंता व्यक्त केली जात आहे. मात्र प्रशासनाच्या मते पीएनजी ही अधिक सुरक्षित आणि सातत्यपूर्ण इंधन व्यवस्था आहे.
नवीन नियम: एलपीजी नियमन आदेशात (LPG Regulation Order) नुकत्याच झालेल्या सुधारणांनुसार, ज्या ग्राहकांना पीएनजी कनेक्शन मिळते, त्यांच्यासाठी आता ३० दिवसांची अनिवार्य कालमर्यादा निश्चित करण्यात आली आहे.
१ जून २०२६ पासून लागू: कुटुंबांना त्यांचे पीएनजी कनेक्शन सुरू झाल्यानंतर ३० दिवसांच्या आत त्यांचे सध्याचे एलपीजी सिलिंडर कनेक्शन अधिकृतपणे रद्द करून सरेंडर करावे लागेल.
कारवाई: जर ग्राहकांनी निर्धारित ३० दिवसांच्या मुदतीत एलपीजी कनेक्शन सरेंडर केले नाही, तर गॅस कंपन्यांकडून ते कनेक्शन आपोआप रद्द (Cancel) केले जाऊ शकते.
नवीन प्रणालीअंतर्गत कनेक्शन परत करणे
‘एक घर, एक कनेक्शन’ या उद्दिष्टाने प्रेरित होऊन, हे संक्रमण सुलभ करण्यासाठी इंडेन, भारत गॅस आणि एचपी गॅस यांसारख्या तेल विपणन कंपन्या (OMCs) कनेक्शन हस्तांतरण व्हाउचर प्रणाली सुरू करत आहेत. या धोरणामुळे शहरी रहिवाशांना त्यांचे एलपीजी सिलिंडर आता सुरक्षितपणे परत करता येतील, तसेच त्यांना नंतर त्यांचे एलपीजी कनेक्शन पुन्हा सुरू करण्याचा कायदेशीर हक्कही मिळेल. याचा अर्थ असा की, जर ते पीएनजी (PNG) नसलेल्या भागात राहायला गेले, तर ते त्यांचे एलपीजी कनेक्शन पुन्हा मिळवू शकतात.
