बिहारमधील मुंगेर जिल्ह्यातून एक धक्कादायक घटना समोर आली आहे. पूर्वसराई पोलीस ठाण्याच्या हद्दीतील शाहजुवर रोड परिसरात, कौटुंबिक वादातून एका पत्नीने आपल्या पतीवर, मोहम्मद फैसल खानवर, प्राणघातक हल्ला केला. तिने धारदार शस्त्राने त्याच्या गुप्तांगावर वार केले. हल्ल्यानंतर, आरोपी पत्नी इशरत हसन (उर्फ सानिया) मौल्यवान दागिने आणि त्यांची चार महिन्यांची चिमुरडी मुलगी यांना घेऊन घटनास्थळावरून पळून गेली.
अवैध संबंधांच्या संशयावरून वाद
पीडित मोहम्मद फैसल याने दिलेल्या माहितीनुसार, त्याने १३ एप्रिल २०२५ रोजी भागलपूर येथील रहिवासी असलेल्या सानियाशी लग्न केले होते. सुरुवातीचे काही महिने सर्व काही सुरळीत चालले, परंतु नंतर पत्नीचे दुसऱ्या पुरुषासोबत अनैतिक संबंध असल्याच्या संशयामुळे त्यांच्या नात्यात कटुता निर्माण झाली. फैसलचा आरोप आहे की, त्याची पत्नी फोनवर दुसऱ्या पुरुषाशी सतत बोलायची, ज्यामुळे त्यांच्यात नेहमीच वाद होत असत. सानिया फैसलवर वेगळे राहण्यासाठी सतत दबाव टाकत होती.
झोपेत गुप्तांग चिरलं, 4 टाके पडले
घटनेच्या दिवशी, कामावरून घरी परतल्यानंतर पती-पत्नीमध्ये जोरदार वाद झाला. त्यानंतर फैसल झोपी गेला, पण सानियाने संधी साधून त्याच्या गुप्तांगावर धारदार शस्त्राने वार केले. अतिरक्तस्राव झाल्यामुळे त्याला तातडीने सदर रुग्णालयात नेण्यात आले, जिथे त्याच्या गुप्तांगावर चार टाके घालण्यात आले. डॉक्टरांच्या मते, तो आता धोक्याबाहेर आहे.
पोलिसांची कारवाई
या प्रकरणावर भाष्य करताना पूर्वसराई पोलीस ठाण्याचे प्रभारी अधिकारी (SHO) सौरभ कुमार यांनी सांगितले की, पती-पत्नीमध्ये दीर्घकाळापासून वाद सुरू होते. पोलिसांच्या माहितीनुसार, पतीही पत्नीला मारहाण करत असे. सध्या, मोहम्मद फैसलच्या आईने पोलीस ठाण्यात हमीपत्र (बॉन्ड) सादर केल्यानंतर परिस्थिती निवळली आहे. तरीही, पीडित फैसलने पोलिसांकडे आपली मुलगी परत मिळवून देण्याची आणि पत्नीवर कठोर कायदेशीर कारवाई करण्याची मागणी केली आहे.
