पुणे सोलापूर हायवेवर सकुंडे वस्ती परिसरात आज दुपारी साखळी अपघात घडल्याची घटना समोर आली आहे. Pune–Solapur Highway वर रस्त्यावर लावलेला “Take Diversion” फलक वेळेत न दिसल्यामुळे पुढील चारचाकी वाहन चालकाने अचानक ब्रेक लावला. त्यानंतर मागून येणाऱ्या वाहनांनीही एकामागून एक ब्रेक दाबल्याने चार गाड्यांची साखळी धडक झाली.
या अपघातात सुदैवाने कोणतीही जीवितहानी झाली नाही; मात्र चारही वाहनांचे मोठ्या प्रमाणात नुकसान झाले आहे. घटनेनंतर काही काळ वाहतूक विस्कळीत झाली होती. काही वेळासाठी वाहनांची लांबच लांब रांग लागल्याने प्रवाशांना अडचणींचा सामना करावा लागला.
दरम्यान, याच Pune–Solapur Highway वर यापूर्वीही अशाच प्रकारची गंभीर घटना घडली होती. 14 मार्च रोजी भिगवण–भादलवाडी सर्व्हिस रोडवर रस्त्याचे काम सुरू असताना कोणतेही इशारा फलक लावण्यात आले नव्हते. त्यावेळी अज्ञात ट्रकच्या जोरदार धडकेत दुचाकीस्वाराचा जागीच मृत्यू झाला होता. या अपघातात अजित दगडू वाळके (वय ५४, रा. भिगवण) यांचा दुर्दैवी अंत झाला होता.
या दोन्ही घटनांमुळे रस्ते सुरक्षा व्यवस्थेवर गंभीर प्रश्नचिन्ह निर्माण झाले आहे. स्थानिक नागरिकांच्या मते, रस्त्याच्या कामादरम्यान योग्य सिग्नलिंग, रिफ्लेक्टर, चेतावणी फलक आणि रात्रीच्या वेळी प्रकाश व्यवस्था न केल्यामुळे अपघातांचे प्रमाण वाढत आहे. विशेषतः हायवेवर वेगाने धावणाऱ्या वाहनांसाठी स्पष्ट सूचना नसल्याने अचानक ब्रेक लावण्याच्या घटना वाढत आहेत.
स्थानिक नागरिकांनी प्रशासनाच्या निष्काळजीपणावर तीव्र नाराजी व्यक्त करत, संबंधित विभागाने तातडीने उपाययोजना कराव्यात, अशी मागणी केली आहे. रस्त्याच्या कामादरम्यान योग्य ठिकाणी आणि स्पष्टपणे इशारा फलक लावणे, वेगमर्यादा दर्शविणारे बोर्ड लावणे, तसेच ट्रॅफिक नियंत्रणासाठी मनुष्यबळ तैनात करणे आवश्यक असल्याचे मत व्यक्त केले जात आहे. मात्र, वारंवार अशा घटना घडूनही ठोस पावले उचलली जात नसल्याने नागरिकांमध्ये संतापाचे वातावरण निर्माण झाले आहे.
