छत्रपती संभाजीनगर – कांचनवाडी ते वलाड गावाला जोडणाऱ्या महत्त्वाच्या रस्त्याच्या बांधकामासाठी मालमत्ता संपादन आणि अतिक्रमण हटवण्याची कारवाई सुरू असताना एक हृदयद्रावक प्रसंग घडला. प्रशासनाच्या कारवाईदरम्यान आपले घर पाडले जाणार असल्याचे समजताच एका महिलेला अश्रू अनावर झाले. घर उद्ध्वस्त होण्याच्या भीतीने ती महिलाअधिकाऱ्यांसमोर जोरजोरात रडू लागली आणि तिने हात जोडून किमान दोन दिवसांची मुदत द्यावी, अशी आर्त विनंती केली.
सदर महिला वारंवार अधिकाऱ्यांकडे थोडा वेळ मिळावा, एवढीच मागणी करत होती. “फक्त दोन दिवस द्या, आम्ही घरातील सामान काढतो,” अशी विनवणी ती करत होती. मात्र सुरू असलेली प्रशासकीय कारवाई थांबविण्यात आली नाही. नियोजित कामात अडथळा येऊ नये यासाठी अतिक्रमण हटवण्याची प्रक्रिया पुढे सुरू ठेवण्यात आली.
View this post on Instagram
अतिक्रमण प्रमुख संतोष वाहुले यांच्या मार्गदर्शनाखाली महानगरपालिकेच्या अतिक्रमण हटाव पथकाने ही मोहीम राबवली. रस्ता बांधकामासाठी आवश्यक जागा मोकळी करण्याच्या उद्देशाने अतिक्रमण हटवण्याचे काम करण्यात आले. यावेळी महसूल विभागाचे अधिकारी, महानगरपालिका कर्मचारी तसेच पोलिस बंदोबस्तही तैनात करण्यात आला होता, जेणेकरून कारवाई सुरळीत पार पडावी.
कांचनवाडी–वलाड रस्ता हा परिसरातील नागरिकांसाठी महत्त्वाचा दुवा मानला जात आहे. या रस्त्यामुळे दोन्ही गावांमधील संपर्क सुलभ होणार असून वाहतूक व्यवस्था सुधारण्यास मदत होणार आहे. तसेच स्थानिकांना दळणवळणासाठी मोठा दिलासा मिळणार असल्याचे प्रशासनाकडून सांगण्यात येत आहे.
मात्र विकासकामांसाठी सुरू असलेल्या या कारवाईदरम्यान घडलेला भावनिक प्रसंग पाहून तेथे उपस्थित असलेले अनेकजण क्षणभर स्तब्ध झाले. त्या महिलेचे अश्रू, तिची हतबलता आणि घर वाचवण्याची आर्त धडपड पाहून वातावरण काही काळ गंभीर झाले होते. विकासकामे आवश्यक असली तरी अशा कारवाईत मानवी बाजूही तितकीच महत्त्वाची असल्याची चर्चा परिसरात सुरू झाली आहे.
